Protest against sand Smuggler : भंडारा जिल्ह्यात मोठ्या प्रमाणात अवैधरित्या वाळू उपसा करून तिची तस्करी वाहतूक केली जाते. या वाहतुकीसाठी वापरले जाणारे ट्रॅक्टर आणि टिप्पर भरधाव वेगाने जात असल्याने अनेक अपघात घडले आहेत. काहींना प्राण गमवावे लागले, तर काहींना कायमचे अपंगत्व आले आहे. गरजू घरकुलधारकांना वाळू मिळत नसताना जिल्ह्यातून बाहेरील जिल्ह्यांमध्ये मोठ्या प्रमाणात वाळूची तस्करी Protest against sand Smuggler होत आहे. त्यामुळे काँग्रेसने आता आक्रमक भूमिका घेतली आहे. जिल्ह्यातील अवैध वाळू उपसा आणि वाहतूक तातडीने बंद करावी, अन्यथा काँग्रेस पक्ष रस्त्यावर उतरून महसूल विभाग आणि पोलीस विभागाची पोलखोल करेल, असा इशारा काँग्रेसने दिला आहे. काँग्रेसच्या शिष्टमंडळाने जिल्हाधिकारी आणि पोलीस अधीक्षकांना निवेदन देऊन तातडीने कारवाईची मागणी केली आहे.
काँग्रेसचे आक्रमक पाऊल
खासदार प्रशांत पडोळे, आमदार अभिजीत वंजारी, भंडारा जिल्हा परिषद अध्यक्षा कविता उईके, काँग्रेस जिल्हाध्यक्ष मोहन पंचभाई आणि काँग्रेस प्रदेश सचिव राजू पालीवाल यांच्या नेतृत्वात हे निवेदन देण्यात आले. यावेळी जिल्हाधिकारी, भंडारा जिल्हा पोलीस अधीक्षक नुरुल हसन आणि उपप्रादेशिक परिवहन अधिकारी यांच्यासोबत चर्चा करण्यात आली. खासदार प्रशांत पडोळे आणि आमदार अभिजीत वंजारी यांनी प्रशासनाला इशारा दिला की, पुढील 48 तासांत अवैध वाळू वाहतूक पूर्णपणे थांबवली नाही तर काँग्रेस पक्ष रस्त्यावर उतरून आंदोलन करेल. कुठलाही अनुचित प्रकार घडल्यास त्याला महसूल आणि पोलीस प्रशासन जबाबदार राहील, असा निर्वाणीचा इशारा शिष्टमंडळाने दिला.
शिष्टमंडळातील प्रमुख उपस्थिती
या शिष्टमंडळात माजी आमदार अनिल बावनकर, सभापती नरेश ईश्वरकर, सभापती शितल राऊत, प्रमोद तितिरमारे, धनंजय तिरपुडे, रमेश पारधी, अमरनाथ रगडे, गजानन झंझाड, पवन वंजारी, शंकर राऊत, विजय शहारे, बाणासुर खडसे, राजेश हटवार, अमित खोब्रागडे, सुरेश मेश्राम, प्रेमदास वणवे, लालचंद लोथे, प्यारेलाल वाघमारे, योगराज झलके, कान्हा बावनकर, विनीत देशपांडे, विजय कापसे, मोहपत झंझाड, कैलास मते, उमेश मोहतुरे, देवेंद्र शहारे, हरीचंद्र बाभरे आणि असंख्य कार्यकर्ते उपस्थित होते.
“वाळू वाहतूक थांबली नाही तर रास्ता रोको करू”- प्रशांत पडोळे, खासदार
भंडारा जिल्ह्यातील सुपीक वाळूला महाराष्ट्रात मोठी मागणी आहे. मात्र, जिल्ह्यातील वाळू डेपो सुरू न झाल्यामुळे घरकुलधारकांना वाळू मिळत नाही. त्याचवेळी वाळू तस्करांची अवैध वाहतूक सुरूच आहे. येत्या 48 तासांत वाहतूक थांबली नाही, तर काँग्रेस रस्त्यावर उतरेल आणि याला प्रशासन जबाबदार राहील.
“अधिवेशन काळात कारवाईची मागणी”- अभिजीत वंजारी, आमदार
भंडारा जिल्ह्यातील अवैध वाळू वाहतुकीला जबाबदार असलेल्या अधिकाऱ्यांवर कारवाईची मागणी मी येणाऱ्या अधिवेशनात करणार आहे.
“शासकीय वाळू डेपो सुरू करून तस्करी थांबवा”
जिल्ह्यात मोठ्या प्रमाणात वाळूचा उपसा केला जात आहे. याचा फायदा वाळू तस्करांना होत आहे. त्यामुळे प्रशासनाने शासकीय वाळू डेपो तातडीने सुरू करून सीसीटीव्ही लावून त्यावर नियंत्रण ठेवावे.
