CM Devendra Fadanvis लाखनी नगर पंचायतीमध्ये वेगाने वाढणारी लोकसंख्या, नागरीकरणाचा झपाटा आणि त्यातून उद्भवणाऱ्या पाणीपुरवठा व सांडपाणी व्यवस्थापनाच्या समस्यांमुळे शहरात मूलभूत नागरी सुविधांची तीव्र गरज निर्माण झाली आहे. या पार्श्वभूमीवर आमदार डॉ. परिणय फुके यांनी लाखनीसाठी पाणीपुरवठा सुधारणा व भूमिगत गटार योजनेसाठी शासन स्तरावर सातत्याने पाठपुरावा केला. या मागणीसंदर्भात डॉ. फुके यांनी नुकतेच मा. मुख्यमंत्री श्री. देवेंद्र फडणवीस CM Devendra Fadanvis यांची भेट घेऊन सविस्तर निवेदन सादर केले. त्यांच्या या निवेदनाची दखल घेत मा. मुख्यमंत्री साहेबांनी संबंधित विभागाला तातडीने योजनेस मंजुरी देण्याचे निर्देश दिले
शहराच्या विकासासाठी ही योजना महत्त्वाची
सध्या लाखनी शहरातील अनेक भागांमध्ये अपुरा पाणीपुरवठा होत असून नागरिकांना मोठ्या अडचणींना सामोरे जावे लागत आहे. तसेच, उघड्या नाल्यांमुळे विशेषतः पावसाळ्यात सांडपाणी साचून आरोग्यधोके निर्माण होत आहेत. ही गंभीर परिस्थिती लक्षात घेता आमदार डॉ. फुके यांनी शहराच्या विकासासाठी ही योजना महत्त्वाची असल्याचे अधोरेखित केले. या योजनेसाठी आवश्यक तांत्रिक अहवाल, अंदाजपत्रक व इतर सर्व कागदपत्रे शासनाकडे सादर करण्यात आली असून तातडीने मंजुरी मिळवण्यासाठी त्यांनी प्रभावी पावले उचलली आहेत. त्यामुळे ही बहुप्रतीक्षित योजना लवकरच प्रत्यक्षात अंमलात येण्याची शक्यता निर्माण झाली आहे. आमदार डॉ. फुके यांनी याआधीही लाखनी शहराच्या विकासासाठी अनेक महत्त्वपूर्ण कामे केली आहेत
लाखनी शहराचा सर्वांगीण विकास अधिक वेगाने होईल
रस्ते सुधारणा, विजेची नियमित व्यवस्था, शाळा व अंगणवाड्यांचे उन्नतीकरण, आरोग्य केंद्रांचे आधुनिकीकरण, तसेच क्रीडासुविधा निर्माण यांसारख्या विविध क्षेत्रांत त्यांनी ठोस कार्य केले आहे. पाणीपुरवठा आणि भूमिगत गटार योजना ही त्यांच्या विकासकामांमध्ये आणखी एक मोलाची भर ठरणार असून त्यामुळे लाखनीकरांमध्ये समाधानाचे वातावरण आहे. शासनाच्या सकारात्मक भूमिकेने आणि आमदार डॉ. परिणय फुके यांच्या अथक प्रयत्नांमुळे लाखनी शहराचा सर्वांगीण विकास अधिक वेगाने होईल, असा विश्वास नागरिक व्यक्त करत आहेत.
